Өндірісі өркендеген аймақтың әлеуметтік жағдайы да жақсарады

Мадина Жарас, "Талас тынысы"

Өткен аптада ауданымызға арнайы жұмыс сапарымен келген облыс әкімі Кәрім Көкірекбаев ауданның бірқатар әлеуметтік нысандары мен өндіріс орындарын аралады.

Әуелі Ақкөл ауылындағы аурухананың жай-күйі­мен танысқан облыс басшысы мұнан соң ат басын Қызыләуіт ауылдық округіне қарасты Ақтөбе елді мекеніне бұрды. Жұма күнгі жұмыс сапарында «Ақтөбе» мешітінің жамағатымен жүздескен облыс басшысы облыстың бас имамы Данияр Жұмабаевтан ауылдың діни ахуалы мен мешіттің материалдық тұрғыдан жағдайын сұрастырды. Кәрім Нәсбекұлы әлемді жайлаған діни тұрақсыздық жағдайында жастарды жат ағымдардың ықпалынан сақтап, олардың діни сауаттылығын арттыру бүгінгі күннің өзекті мәселесі екенін атап өтіп, ауыл имамына алдағы уақытта осы бағыттағы жұмыстарды жандандыруды тапсырды.
Облыс басшысының бұл күнгі жұ­мыс сапары бұдан соң Үшарал ауыл­дық округінде жалғасты. Жолай жайылымда жүрген «Байымбет» шаруа қожалығының иелігіндегі уақ малдың жайын көрді. 

Көктеуге жақында шық­қан малдың қоңы жақсы екенін көрген Кәрім Нәсбекұлы аудан әкімі Болат Рысмендиевтен ауылшаруашылық саласын­дағы атқарылып жатқан жұмыстарды сұрады. Өз кезегінде аудан басшысы өңірдегі төрт-түлік мал қыстан күйлі шыққандығын, аталмыш шаруа қожалы­ғын­да уақ малмен қатар, 620 бас ірі қара. 200 жылқы бар екендігін, ауданда «Ал­тын асық», «Құлан» бағдарламалары бойынша жұмыс жанданғанын жет­кізді.
Үшарал ауылындағы Әбдір Сағынтаев атындағы орта мектеп пен осы мектеп жанындағы «Ұлбике» ша­ғын орталығын аралаған Кәрім Көкірекбаев көптен бері шешімін күткен жаңа балабақша салу мәселесін оңтайлы шешу жолдарын қарастырып, ойын жергілікті басшылықпен сондай-ақ ауыл ақсақалдарымен бөлісті.
- 1276 орындық бі­лім ордасында бүгінгі таң­да небәрі 200 бала оқиды. Бұл дегеніңіз мектеп ғи­маратының жарты бөлігі бос тұр деген сөз. Сол себептен жұмыс істеп тұрған шағын орталықтың ауқымын ке­ңей­тіп, ойын алаңдарын, балабақша ауласын кеңей­ту керек, - деген облыс басшысы аталмыш жұмыстарды үйлестіруді аудан әкімі Болат Рысмендиев пен аудан әкімдігі білім бөлімінің басшысы Күлшат Қожатаеваға тапсырды. Алдағы уақытта мектеп ғимараты мен алаңына жүргізілуі тиіс жөндеу жұ­мыс­тарының жоспарымен танысып, өз тарапынан бірқа­тар толықтырулар енгізіп, тапсырмалар берді.
Мектепке жақын орналас­қан, бүгінде пайдалануға берілген спорт алаңын аралап, жұмысын көрген облыс әкімі болашақта салынуы тиіс спорт кешенінің құрылыс жос­парымен де танысып, тағы бір пысықтады. Бұдан кейін ол жөндеу жұмыстары жүргізілетін ауылішілік Е.Үдербаев және Абай көшелерінің жай-жапсарынан хабардар болды. Ауыл ақса­қал­дары тарапынан айтылған ауыз су мәселесі турасындағы өтініштерін тыңдап, тиісті мамандарға тез арада жұмыс тобын құрып, жергілікті тұрғындар тұтынып отырған ауыз судың құрамын тексеруді тапсырды.
Өнеркәсіп саласында айтарлықтай ауқымды жо­баларды жүзеге асырып, бү­гінгі таңда өнім өндіріліп, жаңадан жұмыс орындары ашылып, жергілікті халық игілігін көріп отырған ауданның аталмыш сала­дағы жетістіктері көңіл қуантарлық. Бұл туралы Кәрім Нәсбекұлы “Қаратау” ПРО, «Жамбыл Недр», «Talas Investment Сompany» ЖШС сияқты өндіріс ошақтарын аралағанда мәлім етті. Құрылысқа қажетті өнімдер өндіретін “Қаратау” ПРО ЖШС қазіргі таңда бір жыл­да 110 мың тонна өнім өндіріп, 70 адамды жұмыспен қам­тып отыр. Зауыттың жұмы­сымен танысқан облыс әкімі алдағы уақытта сұра­ныс болса өндірілген өнім­ді шет мемлекеттерге экспортқа шығаруды жос­пар­лауды, сонымен қа­тар мүмкіндігінше өнім көлемін арттыруды қарас­тыру керектігін тілге тиек етті. «Жамбыл недр» жауапкершілігі шектеулі се­ріктестігі мен натрий цианидін өндіретін іргелі «Talas Investment Сompany» ЖШС басшылары об­лыс әкіміне өндіріс орын­дарының жұмысын кеңінен әңгімеледі.
“Моноқалаларды да­мы­ту­дың -2012-2020 жылдарға” арналған бағдарламасы» аясында Қаратау қаласының инфрақұрылымы қайта жан­­­данып келеді. Тоқырау жылдарында бұзылған көп­­­теген көп қабатты тұр­ғын үйлердің бірқатары толығымен қайта жөндеуден өтіп, ел игілігіне берілуі сөзімізге дәлел. Қаладағы 3-мөлтек ауданындағы 120 пәтерлі №51 үйді қайта жөндеу жұмыстары өткен жылдың тамыз айында басталған. Мердігер ком­па­ния «Өмірзақ» жауап­кер­шілігі шектеулі серік­тестігі бүгінде бұл жұ­­мыс­тарды толығымен аяқтаған. Толықтай жаң­ғыр­тылған пәтерлердің бір­қатарын аралап көрген Кәрім Көкірекбаев се­рік­тестік басшысына ал­ғысын білдіріп, аудан бас­шылығына тұрғын үйдің ауласын абаттандыру жұ­мысын жеделдетуді тап­сырды.