Нарбол Қашаған, Талас тынысы"
Балалар өнер мектебінде Қазақстан мұсылмандар діни басқармасы жанынан құрылған республикалық ақпараттық-насихат тобының мүшесі Қабылбек Әліпбайұлының қатысуымен білім саласы қызметкерлері арасында діндегі радикалды ағымдардың қауіпін түсіндіруге арналған кездесу өтті.
Аудан әкімдігі ішкі саясат бөлімінің басшысы Жасөркен Жақсылықтың төрағалығымен өткен басқосуда әлемді дүрліктіріп отырған террорлық қақтығыстарға қатысты пікір білдірген Қабылбек Әліпбайұлы: - Біздер бірнеше жыл бұрынырақ радикалды діндерге байланысты әңгіме болса, шетелдерді мысалға келтіретінбіз. Көп ұзаған жоқ ондай жағдайлар біздің қоғамда да көрініс бере бастады. Бүгінде жастардың дінге деген бетбұрысы өте қарқынды. Сондықтан, тәрбие отбасынан басталады. Кейін өкінбес үшін, бұл бағыттағы жауапкершілігімізді сезінуіміз қажет.
Бізге дін дәстүр арқылы жетті. Уақыт өте екі құндылығымыз өзара үйлесім тапты. Ал, радикалды ағымдардың мақсаты тек дінді насихаттау арқылы дәстүрден ұлтты алшақтату болып табылады. Сол себепті, діни сауатты жетілдіруіміз керек, - деді.
Жиынды қорытындылаған аудандық Қаратау орталық мешітінің бас имамы Нұрсұлтан Әлиев ұрпақ тәрбиесін назарға алып, арнайы шаралар арқылы балалардың діни танымын арттыру қажеттігін жеткізді.