Өзекті мәселелер әңгіме арқауына айналды

“Нұр Отан” партиясының облыстық филиалы Саяси кеңесінің мүшесі, облыстық мәс­лихаттың депутаты, фракция жетекшісінің орынбасары Гүлсін Рахымжанқызы Орынбаева, “Нұр Отан” партиясының облыстық филиалы ұйымдастыру және бақылау жұмысы бөлімінің кеңесшісі Қырғызәлі Тілеуов, Сарысу ауданы әкімінің міндетін атқарушы Олжас Тұрғынұлы Көкей, Талас ауданы әкімінің орынбасары Серік Дадабаев, облыстық, Сарысу, Талас аудандық мәслихаттарының депутаттары мен бөлім, мекеме басшыларының қатысуымен аудан әкімдігінің мәжіліс залында облыстық мәслихаттағы депутаттық фракцияның көшпелі отырысы өтті.

Онда Моноқалаларды дамытудың 2012-2020 жылдарға арналған бағдарламасы аясында Қаратау, Жаңатас қалаларында жүзеге асуы және шағын қалалардың экономикалық даму барысы жөнінде мәселелер төңірегінде сөз қозғалды.
Жиынды ашып берген Гүлсін Рахымжанқызы 2012 жылы 5 мамыр­да Қазақстан Республика­сының Үкіметі “Моно­қала­ларды дамыту туралы” бағдарламаны бекітіп, ол ауқымды қарқын алғанын айта келіп:
- Сол бағдарлама бойынша тізімге облысы­мыздағы Қаратау, Жаңатас қалалары да кіріп, олардың инфрақұрылымын дамыту үшін қомақты қаржылар бөлінді. Моноқалаларды дамытудың әртүрлі тармағы бар, сол қалай жүзеге асуда,-деп алғашқы сөз кезегін О.Т.Көкейге берді. Ол бағдарлама бойынша Жаңатас қаласында атқарылып жатқан істерге кеңінен тоқталып, облыстық мәслихат депутаттары тарапынан қойылған сауалдарға жауап берді.
Келесі кезекте Қаратау қаласының әкімі Қойшыбай Орынбекұлы Махашев сөз сөйледі. Қала әкімі “Моноқалаларды дамыту” бағдарламасы негізінде Қаратау қаласында қыруар тірліктің атқарылып, жұмыссыздар санының азайғанын, өндіріс орындарының қайта ашылып жатқанын, ауыз су, кәріз жүйелері жүргізіліп, қаладағы облыстық мәслихат депутаттарынан осы жолдарды орта жөндеуге көмектесуге ықпал етулерін сұранды.
Ал, облыстық мәслихаттың депутаты, “TalasInvestment Company” ЖШС-ң бас дирек­­торы Бақтияр Алда­­шов зауыт 1 млрд. 200 миллион теңгені құрай­тын жобаны іске асырғанын, бұл күнде зауытта 620 адам жұмыс істейтінін, т.б. мәселелерден мағлұмат беріп өтті.
Аудандық мәслихаттағы депутаттық фракцияның мүшесі, Қаратау гуманитарлық-техникалық колледждің директоры Докторбек Мәселбеков “Жұмыспен қамту-2020” бағдарла­масы бойынша мамандар­ды даярлау және қайта даярлау мәселесіне тоқ­талса, фракция мүшесі, аудандық “Талас тынысы” газетінің директор-бас редакторы Дүйсен Молдақұлов: -Өздеріңізге белгілі қаламызға ауыз су мен кәріз жүйелері қатар тартылып, соның нәтижесінде, қазылмаған көше, бүлінбеген ас­фальт қалмады. Қазір қаратаулықтар үшін шешімін күткен ең күр­делі мәселе осы көшелердің жағдайы болып отыр,-дей келе, жазға қарай көшеден өткен автокөлік соңын­­да қалың шаң қалатынын айтып, қала жұртшылығы далаға жуылған киімдерін жая алмай, аулада отырып ас іше алмай қалғандарын жеткізді. Сондықтан, осынау өзекті мәселеге қатысты көмек берулерін сұрады.
Гүлсін Рахымжан­қызы өте актуальды мәселелердің көтеріліп отырғанын, бұл мәсе­ле­­лерді облыс­тық мәс­ли­хатта талдайтын­дарын айтып, жиынға қатысушыларға ризашылық білдірді.