Еңбек бақытқа бастайды

Нарбол Қашаған, "Талас тынысы"

Үстіміздегі жылы облыс әкімдігінің Жастар саясаты мәселелері басқармасымен «Жасыл Ел» бағдарламасы шеңберінде келісім шарт жасалып, 16 мен 29 жас аралығындағы жұмыссыз жастарды маусымдық жұмысқа тарту мақсатында 1128,0 мың теңге бөлінді.

Әр ниет білдірген азаматқа тиіс­ті жалақысы төленді. Көктемгі көгал­дандыру-көгеріштендіру шараларының нәтижесінде жастардың күшімен қала саябақтарына тал-дарақтар мен жеміс ағаштары отырғызылды. Гүл көшеттері егіліп, көше бойындағы талдар балақталып, әктелді.
Сондай-ақ, бұл тарапта студенттердің құрылыс жасағы жанданып, жылдан жылға жүйелі жұмыстарымен ерекше­леніп келеді. Ісіне ынталы белсенді жастардың жасағы - тұлғаның мінезін қалыптастырып, борыш сезіміне тәрбие­лейтін еңбек майданы. Бүгінде аудандық емхананың құрылыс басында өңірдегі жоғары оқу орындарынан тартылған 20-ға жуық студент бос уақытын мағыналы мақсатқа жұмсап, табандылықтың үлгісін көрсетіп келеді. Белсенді студенттердің жай-күйімен та­нысу мақсатында ТарПИ-дің 3 курс сту­денті Нұрайым Әлімқұлованы әңгімеге тартқанымызда: - Біз 15 маусымнан бас­тап құрылыс басындамыз. Мерзім 15 шіл­деге дейін. Кәдімгі 8 сағаттық жұ­мыс уа­қыты. Мұндағы жағдайымыз жақсы. Үш мезгіл тамақ беріледі. Жатақханамен қамтамасыз етілген. Сенбі-жексенбі күндері «Жастар ресурстық орталығы» мамандары түрлі концерттік бағдар­ламалар ұйымдастырып, уақытымыздың көңілді өтуіне септігін тигізеді,-деп мемлекет тарапынан жастарға көрсетілген қолдауларға ризашылығын білдірді.