"Бастау", "Ностальгия" және квас шығару қолға алынуда

Индира Еркінқызы, "Талас тынысы"

Жалпы өркениетті елдердің қай – қайсысын алсақ та өздерінің экономикалық және әлеуметтік мәселелерін шешуде кәсіпкерлікке арқа сүйейді. Себебі, кәсіпкерлік халықтың әл-ауқатын арттырумен қатар қосымша жұмыс орындарының ашылуына да септігін тигізеді.

Осы бір ойды ерте түсініп, мем­лекет­тің көмегінсіз кәсіпкер­лікпен ерте­рек айна­лы­сып, халықты жұ­мыс­пен қамтып, бү­гінде кәсібінің нәсібін көріп отырған еңбек ардагері, кәсіпкер Семізбаев Мұрат атамыздың еңбегі көпке үлгі.
Мұрат Пазылұлы еңбек жолын қарапайым құрылысшы болып бастап, әртүрлі салада абыройлы еңбек атқарған. Ал, кәсіпкерлікке сонау 1995 жылдан ден қойып айналыса бастайды. Содан бергі жиырма жылдан аса уақытта кәсібінің тынысын кеңейтіп, бар тәжірибесін ұрпағына үйретіп, еңбектенгеннің еңсесі биік екенін дәлелдеп келеді.
Мұрат ата жетпіс жасқа толса да жұмыс­тан қол үзбей, кәсіпкерлігінің бәсекеге қабілеттілігін арттырып, жақында ғана қаламыздағы базар ішіндегі цех­тан «Бастау» атты газдалған және газдал­маған сусын мен балалардың сүйіп ішетін «Настольгия» лимонады мен шөлді басатын «квас» пен осы сусындарды құятын 0,5-5 литрге дейінгі пласмасса құты (баклашка) шығаруды бастап кетті.
Кәсіпкер мем­лекет­тің сала­лық бағ­дарла­мала­ры­ның бірі “Жұмыспен қамту-2020” бағдар­лама­­сының орындалуына да көңіл бөлуде. Мұнда 8 адам жұмыспен қам­тылған, 3-уі осын­да станоктарды бас­қа­ратын арнайы маман­дар болса, 5-уі көше бойында салқын сусын саудалайтын мектеп жасындағы оқушылар. Бұлардың барлығы да ата-анасына көмектесіп, жазғы демалысын тиімді пайдаланып, күнделікті 1000-1500 тең­геден ақша тауып, еңбектенуде,- деген Мұрат ата, -станоктар Қытайдан әкелінген, оның тұрақты жұмыс істеуіне цех бастығы Ғалымжан Әбдуәлиев пен Оралбай Тоқтамұратовтың еңбектері,- деді.
Станоктардың жұмысына тоқталған Ғалымжан Әбдуәлиев құтыларға құйылатын су таудан тасмалданатынын, ол арнайы сүзгіден өтетіндігі мен құтылар­дың жуылатындығын, кварцтан, ультрафиолет­тен өтіп, тазартылып құйылатындығымен таныстырды.
Ал, Оралбай Тоқтамұратов күнделікті 1000-1500 литр су, 200-300 шөлмек лимонад, әрқайсысы 15 литрден 6 бөшке квас шығаратындарын жеткізді.
Мектеп оқушысы Нұржас Шәйділданы сөзге тартқанымызда:
-Жұмысым өзіме ұнайды, ата-анамның рұқсатымен осында жұмыс істеп жүрмін және еңбегімнің ақысын күнделікті алып тұрамын, ол ақшаға мектепке қажетті заттарымды аламын,- деген Нұржас келесі жылы да осында жұмыс істегісі келетіндігін қуана айтты.
Кәсіпкер Мұрат Семізбаевтың бұл бір ғана жұмысының саласы, мұнан бө­лек атамыз «Мектеп­ке жол» акциясына тұрақты көмек қо­лын созып, мұқтаж жандарға қайырымдылық жасауды үрдіске айналдырған.
Бүгінде экономи­касы нарықтық бағытқа бет алған Қазақстан үшін кәсіпкерлікті дамыту мәселесі - өзекті мәселелердің бірі болып табылады.
Мұрат Пазылұлы сынды кәсіпкерлер өз қалтасының қа­мын ғана емес, экономикамыздың дамуына, жұмыссыз­дық­тың жойылуына теңізге құйған тамшы­дай болса да үлес қосып келеді. Бұл еңбектері еліміздің ертеңі жастарға үлгі, үлкендерге қуаныш.